Meta-ն կարող է դառնալ աշխարհի ամենամեծ գովազդային հարթակը
Meta-ն առաջիկա մեկ տարվա ընթացքում կարող է դառնալ աշխարհի ամենամեծ գովազդային հարթակը՝ առաջ անցնելով Google-ից։ Այս մասին գրում է Wolfgang Digital-ի գործադիր տնօրեն Բրենդան Ալմակը՝ վերլուծելով տեխնոլոգիական հսկաների 2026 թվականի առաջին եռամսյակի ֆինանսական արդյունքները։
Ըստ հոդվածի՝ Alphabet-ը՝ Google-ի մայր ընկերությունը, ընդհանուր եկամուտներով դեռ ավելի մեծ ընկերություն է, սակայն նրա եկամուտները ձևավորվում են ոչ միայն գովազդից, այլև ամպային և այլ ծառայություններից։ Գովազդային բիզնեսի իրական պատկերը դիտարկելու դեպքում Meta-ի և Google-ի միջև տարբերությունն արդեն զգալիորեն փոքր է։
2026 թվականի առաջին եռամսյակում Google-ի գովազդային եկամուտը կազմել է 77 միլիարդ դոլար։ Սակայն, հաշվի առնելով թրաֆիկի ձեռքբերման ծախսերը, այդ թիվը նվազում է մինչև մոտ 62 միլիարդ դոլար։ Նույն ժամանակահատվածում Meta-ի եկամուտը կազմել է 56 միլիարդ դոլար։ Հեղինակի գնահատմամբ՝ եթե Meta-ն պահպանի աճի ներկայիս տեմպը, ապա արդեն 2027 թվականի առաջին եռամսյակում կարող է գերազանցել
Google-ին գովազդային եկամուտներով։ Meta-ի արագ աճի հիմնական պատճառներից մեկը արհեստական բանականությունն է։ Ընկերության AI համակարգերը կարողանում են ավելի ճշգրիտ հասկանալ օգտատերերի վարքը և գովազդը ցուցադրել այն փուլում, երբ մարդը դեռ չի էլ սկսել որոնել ապրանքը կամ ծառայությունը։ Այսինքն՝ Meta-ն կարողանում է ազդել գնման որոշման վրա ավելի վաղ, քան Google-ը։ Մյուս կարևոր գործոնը կարճ տեսանյութերի տարածումն է։ Reels-ը դարձել է Instagram-ում անցկացվող ժամանակի հիմնական ձևաչափերից մեկը, իսկ օգտատերերի վարքագծային տվյալները Meta-ի գովազդային ալգորիթմները դարձնում են ավելի արդյունավետ։
Հոդվածում առանձնացվում է նաև Meta-ի Conversion API-ն, որը օգնում է գովազդատուներին ավելի լավ հասկանալ՝ որ գովազդներն են իրականում բերում վաճառքի։ Սա հատկապես կարևոր է cookie-ների սահմանափակումների և Apple-ի գաղտնիության քաղաքականության փոփոխություններից հետո։ Չնայած Google-ը շարունակում է մնալ թվային գովազդի ամենաուժեղ խաղացողներից մեկը, հոդվածի հիմնական միտքն այն է, որ շուկայի կենտրոնը աստիճանաբար փոխվում է։ Meta-ն արագորեն ուժեղացնում է իր դիրքերը՝ դառնալով հարթակ, որտեղ բրենդները կարող են ազդել հաճախորդի որոշման վրա դեռ որոնումից առաջ։
